வெண்ணிலா மஞ்சரி
(காலாண்டிதழ்)

வெண்ணிலா மஞ்சரி

பிரதம ஆசிரியர்:
எஸ். ஏ. கப்பார்

1978 எப்ரல் மாதம் 'வெண்ணிலா' கலை இலக்கியச் சஞ்சிகை மாத இதழாக உதயமாகி தொடர்ந்து 12 இதழ்கள் வெளிவந்தன. இச் சஞ்சிகையை அதன் ஆசிரியர் எழுத்தாளர் எஸ். ஏ. கப்பார் அவர்கள் காவியன் என்ற புனைப் பெயரில் நடாத்தி வந்தார். தவிர்க்கமுடியாத சில காரணங்களால் இடையில் நின்றுபோயிற்று.

மீண்டும் 43 வருடங்களின் பின் ஏப்ரல் 2021 இல் 'வெண்ணிலா கவிதை மஞ்சரி' என்ற பெயரில் காலாண்டிதழாக வெளியிடப்பட்டு தொடர்ச்சியாக வெளிவந்தவண்ணமுள்ளன.

'வாசிப்பை மேம்படுத்துவதும், புதிய பல கவிஞர்களை உருவாக்குவதுமே எமது நோக்கம்' என்ற கருப் பொருளுடன் வெளிவந்துகொண்டிருக்கும் வெண்ணிலா கவிதை மஞ்சரியானது வளர்ந்துவரும் இளம் படைப்பாளிகளுக்குக் களம் அமைத்துக் கொடுத்து அவர்களின் ஆக்கங்களைப் பிரசுரித்து வரும் அதே வேளை மூத்த எழுத்தாளர்களின் ஆக்கங்களுக்கு முன்னுரிமை வழங்கி அவர்களைக் கௌரவப்படுத்தியும் வருகிறது.

இச் சஞ்சிகையில் அட்டைப்படக் கட்டுரை, அட்டைப்படக் கவிதை, மறைந்த இலக்கிய ஆளுமைகளின் இரங்கற் குறிப்புகள், புதிய வெளியீடுகள் சம்மந்தமான நூல் அறிமுகம், சிறப்புப் பார்வை, நூல் நயம், விமர்சனங்கள், சிறு கதைகள், அறிவியற் கட்டுரைகள், தடம் பதித்த மூத்த கவிஞர்களின் கவிதைகள், மஞ்சரி கவிதைகள், மொழிபெயர்ப்புக் கவிதைகள், படித்தவற்றில் பிடித்த கவிதைகள் என இன்னும் பல அம்சங்கள் இடம் பெறுகின்றன.

அண்மையில் 11-12-2024 கிழக்கு மாகாண பண்பாட்டலுவல்கள் திணைக்களம், திருகோணமலை இந்து கலாசார மண்டபத்தில் நடாத்திய கிழக்கு மாகாண இலக்கிய விழா – 2024இல் 2022ஆம் ஆண்டு கிழக்கு மாகாணத்தில் வெளிவந்த சஞ்சிகைகளில் வெண்ணிலா கவிதை மஞ்சரி சிறந்த சஞ்சிகையாகத் தெரிவுசெய்யப்பட்டு விருதும் பாராட்டும் பணப் பரிசும் வழங்கிக் கௌரவிக்கப்பட்டது.